Cənubi Qafqazda su resurslarına həsr edilmiş ABŞ Beynəlxalq İnkişaf Agentliyinin regional simpoziumu 29-31 yanvar, 2006-cı ildə Tiflisdə, Gürcüstanda keçirilmişdir. Simpoziumda proqramın məqsədləri, vəzifələri və gözlənilən nəticələr müzakirə olunmuşdur. Layihənin regional iştirakçılarının fəaliyyətlərinin təqdimatı, eləcə də 2006-cı il üçün Cənubi Qafqazda su resurslarına dair proqramın təqdimatı keçirilmişdir. Simpoziumun üçüncü günündə proqramın bütün iştirakçıları komponentlər və işçi qrupların yaradılması üzrə qruplarda işlədilər. Nəhayət, bu qruplar qəbul olunmuş qərarlara və öhdəliklərə dair öz prezentasiyalarını təqdim etdilər. Simpoziumda ABŞ-ın Gürcüstandakı səfiri Con F. Tefft, ABŞ Beynəlxalq İnkişaf Aqentlyinin nümayəndələri, Azərbaycan, Ermənistan, Gürcüstanda nümayəndələr, eləcə də müxtəlif təşkilat və fondların təmsilçiləri (Avrasiya Fondundan Robert O’Donovan və.s. ) iştirak ediblər. Azərbaycanı simpoziumda Məmməd Əsədov (Kənd Təsərrüfatı Nazirliyinin Dövlət Meliorasiya və Su resursları Aqentliyinin Elm, Proyektləşdirmə və Ekspertiza Departamentinin Direktoru), Sahib Xəlilov (Ekologiya və Təbii Sərvətlər Nazirliyinin Milli Hidrometeorologiya Departamentinin baş mühəndisi), Asif Verdiyev, Şamil Hüseynov, Mütəllim Əbdülhəsənov, Mətanət Avazova, Elmira Mehdiyeva, Lyana Məmmədova, Rüstəm Məmmədov. “Xəzər – Gələcək Naminə Tərəfdaşlıq” İctimai Birliyini birliyin prezidenti Rüstəm Məmmədov simpoziumda təmsil etmişdir.

Göstərilən proqramın məqsədi sərhədyanı su resurslarının idarə edilməsindən regional əməkdaşlığın səviyyəsinin artırılmasından, onu effektiv və həyat qabiliyyətli etməkdən ibarətdir. Cənubi Qafqazda su resursları üzrə proqram üç komponentdən ibarətdir.

Komponent – 1. Transsərhəd basseyninin idarə edilməsi üçün institusional sturkturların gücləndirilməsi və bu prosesin dərki. Komponent 1-in əsas məqsədi bütün basseyn üzrə su resurslarının, eləcə də Cənubi Qafqazdakı bütün transsərhəd su resurslarının idarə edilməsində zəruri olan institutların gücləndirilməsidir.
Komponent – 2. Elmi və analitik potensialın genişləndirilməsi və idarəetmədə elmdən düzgün istifadə edilməsinə yardım edilməsi. Bu komponentin əsas məqsədi ondan ibarətdir ki, su axını, suyun keyfiyyəti və hal-hazırda beynəlxalq standartlara cavab verməyən tullantılar haqqında ilkin verilənlər bazasının yaxşılaşdırılması yolu ilə bütün transsərhəd əməkdaşlıq zonasında və ya bütün basseyndə planlaşdırma /həll etmənin tələbləri yerinə yetirilsin.
Komponent – 3. Birgə idarəetmə və real nəticələrin əldə edilməsi üçün Vətəndaş cəmiyyətinin iştirakının gücləndirilməsi. Bu komponentin ümumi məqsədi – Qafqaz regionunda su resurslarının idarə edilməsində Vətəndaş Cəmiyyətinin iştirakını təmin etməkdir.

Proqram Qafqaz regionunda transsərhəd əməkdaşlığının əsas vəzifələrini həll etməyə kömək edəcək. Bundan savayı Proqramın nəticələri arasında aşağıdakıları qeyd etmək olar:

 Region xalqları arasında inamın və etibarın artırılması;

 Ətraf mühitin və ekosistemdə baş verən proseslərin qorunması;

 İcmalar üçün sosial və iqtisadi rifahlarının artırılması;

 Regionda su resurslarının idarə edilməsinin demokratikləşdirilməsi və desentralizasiyasına yardım.