|
MDB-nin Minskdə yerləşən baş qərargahında Birliyin nizamnamə və digər orqanlarında daimi səlahiyyətli nümayəndələri Şurasının növbədənkənar iclası keçirilib. MDB İcraiyyə Komitəsinin mətbuat xidmətindən bildiriblər ki, iclas Rusiya nümayəndəliyinin təşəbbüsü ilə keçirilib. İştirakçılar 2011-2012-ci illərdə humanitar əməkdaşlıq sahəsində prioritet tədbirlər planının layihəsini təsdiq ediblər. Sənəd MDB Humanitar Əməkdaşlıq Şurasının təşəbbüsü ilə hazırlanıb.
Plan MDB ölkələrində humanitar sahədə əməkdaşlığın əlaqələndirilməsində səmərəli vasitə olacaq. Sənəd ümumi humanitar xarakterli tədbirlər, mədəni-maarif tədbirləri, mədəniyyət, təhsil, elm, informasiya və kütləvi kommunikasiya, tarix-mədəni irs, kitab nəşri, satışı və poliqrafiya, idman və sağlam həyat tərzi, turizm, gənclərlə iş bölmələrindən ibarətdir.
Planda nəzərdə tutulmuş tədbirlərin həyata keçirilməsində əsas rolu Humanitar Əməkdaşlıq Şurası oynayacaq. Tədbirləri MDB Dövlətlərarası Humanitar Əməkdaşlıq Fondu maliyyələşdirəcək.
www.anspress.com
|
