|
Bu gün Minskdə, MDB İcraiyyə Komitəsində MDB üzvü olan dövlətlərin əmək, miqrasiya və əhalinin sosial müdafiəsi üzrə Məşvərət Şurasının iclası keçiriləcək.
Şura üzvləri MDB-nin üzvü olan dövlətlərdə əməyin normalaşdırılması, razılaşdırılmış sosial və demoqrafik siyasət, Çernobıl qəzası, digər radiasiya fəlakətləri və qəzalar, habelə nüvə sınaqları nəticəsində radiasiya təsirinə məruz qalmış vətəndaşların sosial müdafiəsi və onların sağlamlığının qorunması, son illərdə MDB ölkələrində əhalinin pensiya təminatı sayəsində baş vermiş dəyişikliklər nəzərə alınmaqla bu sahədə dövlətlərarası münasibətlərin inkişafı məsələlərini müzakirə edəcəklər.
MDB İcraiyyə Komitəsinin mətbuat xidmətininin məlumatına görə, Şura həm də milli əmək bazarlarında əmək resurslarına tələbat, ümumi əmək bazarının mərhələlər üzrə formalaşması və Birlik üzvü olan dövlətlərin işçi qüvvəsinin miqrasiyasının tənzimlənməsi barədə informasiya mübadiləsi sistemi yaradılması məsələsinə baxacaq.
2020-ci ilə qədər olan dövr üçün Müstəqil Dövlətlər Birliyinin iqtisadi inkişaf strategiyasının müddəalarının və üzv dövlətlərin razılaşdırılmış miqrasiya siyasəti haqqında Bəyannamədə təsbit olunmuş prinsiplərin praktiki reallaşmasına yönəldilmiş birinci dərəcəli Kompleks Tədbirlər Planının yerinə yetirilməsi gedişinə xüsusi əhəmiyyət veriləcək. Xatırladaq ki, həmin Kompleks Tədbirlər Planının icraçılarından biri də Məşvərət Şurasıdır.
Şura üzvləri növbəti iclasın gündəliyini və keçiriləcəyi tarixi də müəyyənləşdirəcəklər.
www.anspress.com
|
