|
Azərbacan NATO üçün vacib partnyordur, - Trend-in məlumatına görə, bu sözləri cümə axşamı Rumıniyanın Azərbaycandakı fövqəladə və səlahiyyətili səfiri Nikolaye Ureke Azərbaycan Dillər Universitetində tələbələrlə görüşü zamanı deyib.
NATO-nun 61-ci ildönümü ilə əlaqədar olaraq, "NATO əməkdaşlıq İnstitutu" NATO-ya üzv dövlətlərin Azərbaycandakı səfirlikləri ilə bərabər aprel ayını Azərbaycanda NATO ayı elan edib. NATO ayı çərçivəsində keçirilən bu görüşdə NATO-nun missiyası haqqında "Şimali Atlantika alyansı: NATO bu gün və sabah" adlı sənədli film nümayiş etdirilib.
"Azərbaycan antiterror əməliyyatlarında fəal iştirakına, geostrateji mövqeyinə və enerji təhlükəsizliyi probleminin həlli üçün potensialına görə NATO üçün əhəmiyyətli ölkədir." - Ureke əlavə edib.
NATO-nun Cənubi Qafqaz dövlətləri - Azərbaycan, Gürcüstan və Ermənistan ilə əməkdaşlığı, əsasən, "Sülh naminə tərəfdaşlıq", "Fərdi tərəfdaşlıq üzrə fəaliyyət planı", həmçinin, "Planlaşdırma prosesi və analiz" proqramları əsasında həyata keçirilir. Həmin sənədlərdə tərəfdaş ölkələrin Şimali Atlantika Alyansı ilə müdafiə, təhlükəsizlik və hərbi siyasət sahələrində islahatlara dair məsləhətlərin aparılması üzrə məqsəd və niyyətləri müəyyən olunub.
İslahatların aparılmasına yardım göstərilməsi ilə yanaşı, NATO ilə Azərbaycan arasında əməkdaşlığın mühüm məqsədlərindən biri sülhməramlı əməliyyatların və böhrana çevik reaksiya əməliyyatlarının aparılması zamanı ölkənin silahlı qüvvələrinin qabiliyyətini NATO ölkələri qüvvələri ilə qarşılıqlı fəaliyyət səviyyəsində inkişaf etdirməkdir. 1999-cu ildən Azərbaycanın hərbi kontingenti NATO-nun Kosovoda, 2002-ci ildən isə Əfqanıstanda sülhməramlı əməliyyatların aparılmasına dəstək göstərib.
www.trend.az
|
