|
Bu gündən Avropa İttifaqı Cənubi Qafqaz ölkələrində “İnteqrasiya olunmuş sərhədlərin idarə olunması” adlı yeni proqramın icrasına başlayır. Gürcüstanın paytaxtı Tiflis şəhərində təqdimatı keçirilən layihə BMT-nin inkişaf proqramı çərçivəsində reallaşacaq. Avropa İttifaqı tərəfindən maliyyələşdirilən və 2,5 il davam edəcək proqrama 6.3 milyon avro vəsait sərf olunacaq. Əsas məqsəd isə Cənubi Qafqaz ölkələrində təhlükəsiz açıq sərhəd sisteminin təşkilinə dəstək vermək və bunun üçün hər üç ölkə arasında əməkdaşlığın inkişafına çalışmaqdır.
“Bu proqram içərisində bir neçə komponentlər nəzərdə tutulur. Bunlardan birincisi texniki yardımların edilməsi, sərhəd xidmətinin təşkilində lazımı məsləhətlərin verilməsi və sərhəd xidmətinin daha yaxşı təşkili üçün müxtəlif təlimlərin keçirilməsidir. Burada əsas komponentlərdən biri də sınaq layihələr həyata keçirilməsindən ibarətdir”, - deyə Avropa İttifaqı Gürcüstan nümayəndəliyinin təmsilçisi Martin Kluçke bildirib.
Amma Avropa İttifaqının təmsilçisi Ermənistanın işğalçılıq siyasətinə görə Azərbaycanla Ermənistanın müharibə şəraitində olmasını diqqətə çatdırıb və bu səbəbdən də hələlik hər iki ölkənin sərhədlərinin idarə olunmasında əməkdaşlığın yalnız informasiya mübadiləsi səviyyəsində aparılcağına ümid bəsləndiyini deyib: “Biz bilirik ki, Azərbaycanla Ermənistan arasında sərhədlər açıq deyil. Ona görə də, birgə əməkdaşlıq hələ ki, mümkün olmayacaq. Bununla belə hər iki ölkə arasında informasiya mübadiləsini təşkil etmək olar və Avropa İttifaqının təcrübəsi və standartlarını burada aşılamaq mümkündür. Bizim Avropa İttifaqı qonşuluq siyasəti çərçivəsində bu ölkələrlə əməkdaşlıq etmək barədə öhdəliyimiz var və ümid edirik ki, bir gün Azərbaycan və Ermənistan arasında da sərhədlər açılacaq, bu təcrübədən hər iki ölkə yararlana biləcək”.
Təşkilatçıların verdiyi məlumata görə, təqdimat mərasimində Gürcüstan və Ermənistandan nümayəndələr iştirak etsə də, texniki səbəblərdən Azərbaycan tərəfi tədbirdə təmsil olunmayıb.
www.anspress.com
|
