|
Avropa İttifaqının Cənubi Qafqaz üzrə xüsusi nümayəndəsi Piter Semnebi Azərbaycandadır. Semnebi rəsmi görüşlərə sabah başlayacaq. Onun Azərbaycan rəsmi dairələri və qeyri-hökumət təşkilatları ilə görüşləri olacaq. Səfər fevralın 25-də başa çatacaq. Hava limanında jurnalistlərə müsahibəsində Semnebi bildirib ki, səfəri zamanı müzakirə edəcəyi əsas məsələ Dağlıq Qarabağ münaqişəsi olacaq.
“Səfərimin məqsədi Avropa Birliyi ilə Azərbaycan arasındakı gündəmdə olan məsələləri müzakirə etməkdir. Biz burada Azərbaycanın Avropa Birliyinə yaxınlaşmasını müzakirə edəcəyik. Bundan başqa enerji təhlükəsizliyinin problemləri və Avropa ölkələrinin bu regiondan enerji daşıyıcıların təminatı da müzakirə mövzusuna daxildir. Əlbəttə regional məsələlər, o cümlədən də Dağlıq Qarabağın probleminin həlli yolları və Türkiyə-Ermənistan əlaqələrinin normallaşması da müzakirə olunacaq. Biz ümid edirik ki, bu il münaqişənin həlli ili olacaq, çünki vaxt bizi sıxmağa başlayıb, regiondakı vəziyyət isə getdikçə dəyişir. Status-kvo daim davam edə bilməz. Məhz bu səbəbdən də mən güman edirəm ki, keçən il qeydə aldığımız təkan nəticələrə gətirib çıxaracaq. Hər halda biz də hər bir vasitə ilə buna təşəbbüs göstərəcəyik", - deyə Semnebi söyləyib.
www.anspress.com
|
