|
“Biz müharibə şəraitində yaşayırıq. Ancaq bu da həqiqətdir ki, torpaqlarımızı 1990-cı illərin əvvəllərində işğal edən Ermənistan bu gün çox ağır vəziyyətdədir. Azərbaycanın iqtisadiyyatı, təxminən 10 faiz artdı, Ermənistanda isə iqtisadi tənəzzül müşahidə olunur. Ermənistandan fərqli olaraq biz öz hesabımıza yaşayırıq, xaricdən alınan borclar, kreditlər hesabına yaşamırıq. Onlardan fərqli olaraq biz, sözün əsl mənasında, müstəqil siyasət aparırıq, heç bir başqa ölkədən asılı deyilik. Biz həm ordu quruculuğunda, həm iqtisadi inkişaf məsələlərinin həllində, həm də Azərbaycanın dünya miqyasında tanınmasında böyük uğurlar əldə etmişik”. Bunu Azərbaycan prezidenti İlham Əliyev Bakının Lökbatan qəsəbəsində Qarabağ müharibəsi əlilləri və şəhid ailələri üçün tikilmiş binanın açılışı, həmçinin müharibə əlillərinə verilən minik avtomobillərinin təqdimatında deyib. O deyib ki, Dağlıq Qarabağ münaqişəsi, beynəlxalq hüququn norma və prinsipləri əsasında öz həllini tapmalıdır. Dövət başçısının sözlərinə görə, Azərbaycan bu istiqamətdə öz siyasi və diplomatik səylərini gücləndirir.
Prezident İlhm Əliyev bəyan edib ki, bu gün bütün dünya birliyi və xüsusilə bu münaqişə ilə məşğul olan vasitəçilər məsələnin ərazi bütövlüyü prinsipi əsasında həll olunmasını təklif edirlər: “Əminəm ki, bu yanaşma məsələnin tezliklə həll olunmasında bizə kömək göstərəcək. Çünki bütün beynəlxalq hüquq normaları bizim tərəfimizdədir. Ermənistan Azərbaycan torpaqlarını qanunsuz işğal edib və etnik təmizləmə siyasəti nəticəsində yüz minlərlə vətəndaşımız indi öz torpağında qaçqın, köçkün vəziyyətində yaşayır. Dağlıq Qarabağ əzəli Azərbaycan torpağıdır. Hamı yaxşı bilir ki, ermənilər o bölgələrə XIX əsrdə köçürülüblər. Dağlıq Qarabağ Azərbaycanın ayrılmaz hissəsidir. Bunu tarixi həqiqət və beynəlxalq hüquq normaları sübut edir. Heç vaxt Azərbaycan torpağında ikinci erməni dövləti yaradılmayacaq. Heç vaxt Dağlıq Qarabağ müstəqil olmayacaq. Bunu bütün dünya bilir. Ermənistan bu həqiqəti nə qədər tez dərk etsə, məsələ öz həllini o qədər də tez tapar. Məsələ öz həllini tapandan sonra bölgədə sülh tam şəkildə bərqərar oluna bilər. Çünki Ermənistan-Azərbaycan münaqişəsi bölgənin ən böyük problemidir. Bu problem həll olunmadan heç bir başqa problem öz həllini tapa bilməz”.
Dövlət başçısı əminliyini ifadə edib ki, Azərbaycan bütün səylərini gücləndirməklə, ordu quruculuğu, siyasi fəaliyyətin möhkəmləndirilməsi istiqamətində atılacaq növbəti addımlar hesabına, iqtisadi inkişafın hesabına və cəmiyyətdə bütün vətəndaşların bu milli ideya uğrunda birləşməsi sayəsində Dağlıq Qarabağ məsələsi öz həllini tapacaq və ərazi bütövlüyü bərpa olunacaq.
www.anspress.com
|
