|
Niderland Krallığı Azərbaycanla bütün sahələrdə əməkdaşlığa böyük önəm verir. Bunu Niderlandın Azərbaycandakı səfiri Yan-Lukas İnayat van Horn Azərbaycan Dövlət Gömrük Komitəsinin (DGK) sədri Aydın Əliyevlə görüş zamanı deyib. Bu barədə DGK-nın məlumatında deyilir.
"Hazırda dünya maliyyə böhranı şəraitində ölkələr həm ikitərəfli, həm də çoxtərəfli əlaqələrin saxlanmasında maraqlıdır", - səfir deyib.
Onun sözlərinə görə, Niderland Krallığı Azərbaycanla mövcud qarşılıqlı ticari-iqtisadi əlaqələri davam etdirmək və genişləndirmək niyyətindədir.
İkitərəfli əlaqələrin gələcək perspektivlərindən danışan səfir, gömrük orqanları arasındakı gələcək əməkdaşlığın genişləndirilməsində də problemin olmadığını deyib.
Görüşdə ölkələr arasında mövcud olan siyasi, mədəni, ticari-iqtisadi əlaqələrdən danışan DGK rəhbəri Əliyev bildirib ki, gömrük sistemi bu əlaqələrin inkişafı üçün körpü rolunu oynayır.
"2002-ci ildə iki ölkənin gömrük xidməti arasında bağlanmış müqavilə əməkdaşlığın genişləndirilməsinə və effektiv fəaliyyətə stimul verir, tərəflərin qarşılıqlı inteqrasiyasını sürətləndirir", - Əliyev deyib.
Onun sözlərinə görə, gömrük sahəsində əlaqələrin genişləndirilməsi üçün böyük potensial var və bundan istifadə etmək lazımdır.
Azərbaycan Dövlət Statistika Komitəsinin məlumatına görə, 2009-cu ilin yanvar-oktyabrında Azərbaycan və Niderland Krallığı arasındakı mal dövriyyəsi 106,306 milyon dollar təşkil edib və onun 40,92 milyon dolları idxalın, 65,43 milyon dolları isə ixracın payına düşüb.
www.trend.az
|
