|
ABŞ-ın Avrasiyada energetika məsələləri üzrə xüsusi nümayəndəsi Riçard Morninqstar yüksəkvəzifəli hökumət rəsmiləri ilə görüşlər keçirmək üçün Bakıya səfərdədir.
Birləşmiş Ştatların Azərbaycandakı səfirliyinin yaydığı məlumata görə, birgünlük səfər zamanı səfir Morninqstar ABŞ-ın neftin və qazın bu regiondan Avropa və qlobal bazarlara nəqli üçün marşrutların diversifikasiyası sahəsində inkişafa göstərəcəyi dəstək və əməkdaşlıq məsələlərini müzakirə edəcək.
Onun Azərbaycan prezidenti ilə görüşü nəzərdə tutulur. Təxminən 3 saat sonra Riçard Morninqstar Xarici İşlər Nazirliyi və Sənaye və Energetika Nazirliyində görüşlər keçirəcək.
Xatırladaq ki, ABŞ dövlət katibinin xüsusi nümayəndəsi Batumi enerji sammitində iştirak etmək üçün yanvarın 12-də regiona gəlib. O, Tiflisdə Gürcüstan rəsmiləri ilə bir neçə qapalı görüş keçirib.
Batumi enerji sammitinin formatı dəyişdirildiyinə və bu tədbirin əvəzinə beynəlxalq enerji konfransı keçirildiyinə görə Riçard Morninqstar toplantıya qatılmayıb və Tiflisdən Bakıya gəlib.
Qeyd edək ki, ABŞ-ın dövlət katibi Hillari Klinton keçən il səfir Morninqstarı Avrasiya regionunda enerji ehtiyatlarının inkişafı, tranziti və paylanması ilə bağlı siyasət məsələləri üzrə strateji məsləhətlərlə təmin etmək məqsədilə xüsusi nümayəndə vəzifəsinə təyin edib.
Azərbaycana edilən əvvəlki səfərlər zamanı səfir Morninqstar ABŞ-ın "Nabukko" qaz kəməri layihəsi və Avropada enerjinin təhlükəsizliyini təmin edəcək və Azərbaycanın uzunmüddətli inkişafı, müstəqilliyi və suverenliyinə zəmanət verəcək digər təşəbbüsləri dəstəklədiyini bildirib.
www.anspress.com
|
