|
İsveçrənin xarici işlər naziri Mişlin Kalmi-Rey (Micheline Calmy-Rey) bəyan edib ki, Azərbaycan İsveçrə üçün çox yaxşı tərəfdaşdır.
"Azərbaycan çox yaxşı bir tərəfdaşdır. İsveçrənin Azərbaycanla çox yaxşı ikitərəfli münasibətləri var. Bu yaxınlarda Azərbaycan Prezidenti cənab İlham Əliyev İsveçrəyə səfər edib. Bir çox isveçrəli nazir Azərbaycanda olub. Münasibətlərimiz mükəmməldir", cümə axşamı Trend News-a eksklüziv açıqlamasında İsveçrənin xarici işlər naziri və AŞ Nazirlər Komitəsinin yeni sədri Mişlin Kalmi-Rey (Micheline Calmy-Rey) bildirib.
Azərbaycan Dövlət Statistika Komitəsinin məlumatına görə, bu ilin yanvar-sentyabr aylarında Azərbaycan və İsveçrə arasında ticarət dövriyyəsi 68,8 milyon dollar olub.
Nazirin sözlərinə görə, o yenidən Azərbaycana səfər etmək niyyətindədir.
"Azərbaycana səfər etmək istərdim. Artıq bir neçə dəfə Azərbaycanda olmuşam. Amma növbəti səfərlə bağlı konkret tarix deyə bilmərəm", - o bildirib.
Noyabrın 18-də AŞ Nazirlər Komitəsinə sədrlik Sloveniyadan İsveçrəyə keçib. Səlahiyyətlərin ötürülməsi mərasimindən sonra AŞ Baş katibi Torbyorn Yaqland, Sloveniyanın xarici işlər naziri Samuel Zboqar və İsveçrənin xarici işlər naziri və AŞ Nazirlər Komitəsinin sədri Mişlin Kalmi-Reyin iştirakı ilə birgə mətbuat konfransı keçirilib.
www.trend.az
|
