|
Kreditlər növbə ilə veriləcək
Güzəştli ipoteka almaq istəyənlərin sayı həddən artıq çox olduğuna görə, bu ilin büdcəsində sosial ipoteka üçün ayrılan vəsait hamıya kifayət etməyəcək. Belə müştərilərə kredit verəndə onların sənədlərinin banka nə vaxt verildiyi əsas götürüləcək. Yəni kreditlər növbə ilə veriləcək. itv.az xəbər verir ki, ipoteka kreditlərinin başqa məqsədlərlə istifadə edilməməsi üçün prosesə ciddi nəzarət olunur.
Xatırladaq ki, güzəştli kreditlər üçün büdcədə 14 milyon manat nəzərdə tutulub. Hələlik ipoteka fonduna bunun cəmi 2 milyon manatı köçürülüb. Məbləğ kiçik olduğuna görə, onu banklar arasındla bölüşdürmək də mümkün deyil. Mərkəzi Bankın sədr müavini Alim Quliyev : “Məbləğ o qədər kiçikdir ki, banklara kvotalaşdırmağın, limitləşdirməyin özü də mümkün deyil. Bu gün dövlət büdcəsi tərəfindən 2 milyon manat hələlik sosial ipoteka məqsədilə ayrılmış vəsaitin bölgüsünü aparmaq çox çətindir”.
Belə kreditləri almaq hüququ olanların isə sayı minlərlədir. Ona görə də belə müştərilərə kredit verəndə onların sənədlərinin banka nə vaxt verildiyi əsas götürüləcək. Yəni kreditlər növbə ilə veriləcək: “Güzəştli ipoteka kateqoriyasına daxil olan vətəndaşların sayı həddindən artıq çoxdur. İndi onlar öz sənədlərini hazırlayıb, hər hansı banka müraciət etməlidirlər. Bank da təbii ki, sənədləri toplayıb, ipoteka fonduna təqdim eləməlidir”.
Ümumilikdə isə dövlət büdcəsindən ipoteka kreditlərinə ayrılan vəsaitlərin ildən-ilə azalacağı gözlənilir: “Dövlət büdcəsində növbəti illərdə bu məqsəd üçün vəsait nəzərdə tutulacaq, yoxsa tutulmayacaq, bu barədə dəqiq söz deyə bilmərəm. Gördüyünüz kimi ildən ilə vəsaitin həcmi dövlət büdcəsində azalır. Beynəlxalq praktika da bundan ibarətdir ki, ipoteka fondları da özünümaliyyələşdirmə prinsipinə keçməlidir”.
Özünü maliyyələşdirmə o deməkdir ki, ipoteka fondu indiyədək verdiyi kreditlər əsasında istitqrazlar buraxır, həmin istiqrazların satışından əldə olunan pullar isə yeni kreditlər kimi verilir. Amma bu vəsaitlərdən sosial kredit verilməyəcək.
Müştərinin sənədlərini araşdıran bank və İpoteka Fondu ilə yanaşı prosesi Mərkəzi Bankın inspeksiyası da nəzarət edir. Qeyd edək ki, ipoteka kreditləşməsinin başlanmasından indiyədək bir neçə kredit verilib. Mərkəzi Bankda bunu sənədlərin toplanması və texniki çətinliklərlə izah edirər. www.itv.az
|
