|
Azərbaycanda üçüncü sektor təmsilçilərinin etirazlarına rəğmən Milli Məclisin bugünkü iclasına çıxarılan "Qeyri-hökumət təşkilatları, ictimai birliklər və fondlar haqqında" qanununa dəyişikliklər və əlavələrə dair müzakirələr təxirə salınıb. QHT-lər haqqında qanuna dəyişikliklər millət vəkilləri tərəfindən birmənalı qarşılanmayıb. Spiker Oqtay Əsədov bu məsələyə parlamentin növbəti iclasında baxılacağını bildirib.
Bu məsələ paramentin gündəliyində sonuncu olub.
Millət vəkili Pənah Hüseyn spikerdən "Qeyri-hökumət təşkilatları, ictimai birliklər və fondlar haqqında” qanuna gözlənilən dəyişikliklər və əlavələri gündəlikdən çıxartmağı tələb etdi.
Millət vəkilləri Cəmil Həsənli və İqbal Ağazadənin onu dəstəkləməsinə baxmayaraq spiker Oqtay Əsədov qəti şəkildə qanunun müzakirəyə çıxarılmasının tərəfdarı olduğunu dedi.
"Qeyri-hökumət təşkilatları, ictimai birliklər və fondlar haqqında” qanuna gözlənilən dəyişikliklər və əlavələr barədə qanun layihəsi parlamentin gündəliyində 13-cü olduğundan onun müzakirəsi parlamentin sonuna 1 saat qalmış başlandı.
Qanun layihəsini parlamentin müzakirəsinə çıxaran Milli Məclisin Hüquq isiyasəti və dövlət quruculuğu komitəsinin rəhbəri Əli Hüseynov bildirdi ki, sənəddə insanların birləşmək və ifadə azadlığına zidd olan heç nə yoxdur.
Əli Hüseynov həmçinin dəyişikliklərin xarici hüquqi şəxslərin qeydiyyatını nəzərdə tutuduğunu və bunun Azərbaycanın dövlətçiliyi naminə edildiyini dedi.
Amma millət vəkili Qüdrət Həsənquliyev paralmentə təqdim olunan qanun layihəsini tənqid edərək parlamentarları tələskənliyə yol verməməyə çağırdı.
QHT-lərə yardım şurasının rəhbəri, millət vəkili Azay Quliyev isə nəzərdə tutulan dəyişikliklərin bəzilərinin lehinə, bəzilərinin isə əleyhinə oldu. Onun fikrincə, qeyri-hökuumət təşkilatlarının ölkənin 1/3-də filial açması və bunu dövlət reyestrinə salmaları real deyil.
Azay Quliyev həmçinin QHT-lərin əmlakının yalnız 50%-nin xarici donorlar tərəfindən maliyyələşdiriməsinin də əleyhinə çıxdı və bu maddəni tamam çıxartmağı təklif etdi. Millət vəkili QHT qeydiyyatı, pozuntular olarsa inzibati cəzalandırılma və digər məsələlərin lehinə çıxış etdi.
Çıxışa bir xeyli deputatın yazıldığını görən spiker Oqtay Əsədov müzakirələri növbəti iclasa kimi təxirə saldı.
www.bbcnews.com
|
