ABŞ Konqresinin dörd üzvü, Demokrat Partiyasının təmsilçiləri Türkiyə və Ermənistan prezidentlərinə məktub göndəriblər. APA-nın “CNN Turk”ə istinadən yaydığı məlumata görə, konqresmenlər müraciətdə Türkiyə və Ermənistan arasında münasibətlərin normallaşması istiqamətində səyləri dəstəklədiklərini bildiriblər.
Bununla bağlı açıqlama verən Konqresdəki ABŞ-Türkiyə dostluq qrupunun həmsədri Robert Veksler Ermənistanla Türkiyə arasında münasibətlərin normallaşdırılması və Qafqazda pozitiv dialoq və dinamik inkişaf üçün səylərə ABŞ və beynəlxalq ictimaiyyətin dəstək verməsinin mühüm əhəmiyyət daşıdığını deyib: “İrəvan və Ankara arasında fikir ayrılıqlarının aradan qaldırılması, iki ölkə arasında işbirliyi və diplomatik münasibətlərin inkişaf etdirilməsi üçün sağlam təməlin qoyulması həm ABŞ-ın, həm Türkiyənin, həm də Ermənistanın xeyrinədir”. Məktubu R. Vekslerlə yanaşı İlke Skelton, Con Murza və Elsi Hastinqs imzalayıblar.
APA