Bunu İlham Əliyev ilə Serj Sarkisyanın görüşündən sonra jurnalistlərin suallarını cavablandıran Azərbaycanın xarici işlər naziri Elmar Məmmədyarov deyib
Sürixdə Azərbaycan prezidenti İlham Əliyevin və Ermənistan prezidenti Serj Sarkisyanın görüşündən sonra hər iki ölkənin xarici işlər nazirləri açıqlama ilə çıxış ediblər. Azərbaycanın xarici işlər naziri Elmar Məmmədyarov danışıqların Azərbaycanın ərazi bütövlüyü prinsipləri çərçivəsində aparıldığını bildirib. Oyun sözlərinə görə, hazırda hazırlanan və bundan əvvəl mövcüd olan prinsiplər müzakirə mövzusu olub. «Baza prinsiplərindən bəzi razılaşdırılmayan məsələlər var. Hər bir prezident qarşılıqlı anlayış şəklində öz fikrini bildirdi. Təbii ki, bu çətin prosesdir. Lakin irəliyə doğru addım atmaq lazımdı. Bundan başqa yol yoxdur».
Ermənistanın xarici işlər naziri Edvard Nalbandyan isə danışıqların baza sənədləri əsasında aparıldığını qeyd edib. «Hər iki prezident danışıqların müntəzəm xarakter daşıması nöqteyi nəzərindən Dağlıq Qarabağ münaqişəsinin həlli istiqamətində müəyyən dinamikliyin olduğunu qeyd etdilər. Görüşdən görüşə tərəflər bir-birlərini daha yaxşı başa düşürlər və çətinlikləri maneələri həll etməyə çalışırlar. Mən bircə onu qeyd etmək istəyirəm ki, indi söhbət münaqişənin nizama salınmasının prinsiplərinin işlənib hazırlanmasında gedir. Əsas prinsiplər qarşılıqlı razılaşdırıldıqdan sonra tərəflər baza sənədləri üzərində işləməyə başlayacaqlar».
Görüşdə iştirak edən ATƏT-in Minsk qrupunun amerikalı həmsədri Metyu Brayza isə xarici işlər nazirlərinin müzakirəsini dinlədiyini və onların çox müsbət fikirlərinin olduğunu deyib. «Biz eşidirik ki, inkişaf var dinamiklik artıb. Bu müsbət elementdir».
«Əgər prezidentlər özləri bu görüşü müsbət qiymətləndiriblərsə, fikirləşməyin ki,biz onlardan fərqli fikir söyləyəcəyik». Bu açıqlamanı isə Fransadan olan həmsədr Bernar Fasye verib.
Qeyd edək ki,prezidentlər-İlham Əliyev və Serj Sarkisyanın əvvəlcə təkbətək görüşü olub. Görüş ATƏT-in Minsk qrupu həmsədrlərinin iştirakı ilə davam etdirilib. Müzakirələrdə Ermənistan-Azərbaycan, Dağlıq Qarabağ münaqişəsinin həlli ilə bağlı məsələlərin hazırkı vəziyyəti və perspektivləri barədə fikir mübadiləsi aparılıb.
Bu, İlham Əliyev və Serj Sarkisyanın sayca 3-cü görüşüdür. Bundan əvvəl isə hər iki ölkə prezidentləri Sankt-Peterburq və Moskva şəhərlərində görüşüb.
/ANS TV/