Brüsseldə Qara dəniz regionunda demokratiyanın inkişafına həsr olunmuş konfrans keçirilib. APA-nın məlumatına görə, konfransda bölgə ölkələrinin xarici işlər nazirləri, diplomatlar, iqtisadi ekspertlər iştirak ediblər. Konfrans Belçika Kral Beynəlxalq Münasibətlər İnstitutu, Brüssel Azad Universitetinin siyasi həyatın araşdırılması üzrə mərkəzi tərəfindən təşkil olunub. Tədbirdə çıxış edən Belçikanın xarici işlər naziri Karl de Quxt bildirib ki, Qara dəniz regionu Rumıniya və Bolqarıstanın Avropa Birliyinə daxil olmasından sonra bu qurum üçün daha böyük əhəmiyyət kəsb edib: “Avropa Birliyi bölgədəki mövqelərini möhkəmləndirmək üçün bu iki ölkənin təcrübəsindən istifadə etməlidir”. Belçikalı nazir həmçinin qeyd edib ki, onun ölkəsi regionda demokratiyanın yayılması istiqamətində səyləri dəstəkləyir, korrupsiya və mütəşəkkil cinayətkarlıqla mübarizə aparmaqda və Qara dəniz bölgəsi dövlətlərinə kömək edir.