“ABŞ Rusiyanın Gürcüstanda və bütün regionda sabitliyi pozmaq səylərinə qarşı intensiv beynəlxalq əks-hücuma başçılıq etməlidir”. APA-nın “RİA Novosti”yə istinadən verdiyi məlumata görə, bu sözlər ABŞ Senatının Xarici Əlaqələr Komitəsinin sədr müavini, respublikaçı Riçard Luqarın bəyanatında əksini tapıb.

Komitədə Rusiya hökumətinin Gürcüstanın ərazi bütövlüyünə qarşı təhlükəli və provokasion bəyanatlarını pisləyən qətnamə layihəsinin qəbul olunması ilə bağlı bəyanatla çıxış edən R. Liqar Gürcüstanın ABŞ-ın önəmli dostu olduğunu bildirib: “Bu ölkənin gənc rəhbərlərinin əksəriyyəti Amerikada təhsil alıblar və hakimiyyətə gəldikdən sonra tez bir müddətdə Qərb institutlarına qoşulmaq xətti götürüblər. Gürcülər İraq və Əfqanıstandakı əməliyyatlara layiqincə töhfə veriblər. Bu ölkə Xəzər neftinin Bakı-Tiflis-Ceyhan boru kəməri ilə Qərbə çatdırılmasının əsas yükünü də öz üzərinə götürüb”.