|
BƏƏ-dəki “Azərbaycan” Cəmiyyəti Dubay hökuməti nümayəndələrini 20 Yanvar faciəsi barədə məlumatlandırır. Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin sədri Samir İmanov Dubay əmirliyinin Milli, Xeyriyyəçilik və Dini işlər üzrə nazirin müşaviri və Beynəlxalq İslam İnstitutları idarəsinin rəisi Abdullah Yusif Əl-Əli ilə görüşüb.
Samir İmanov görüş zamanı 22 il əvvəl SSRİ rəhbərliyinin göstərişi ilə Azərbaycanda törədilmiş 20 Yanvar faciəsi ilə bağlı məlumat verib, həmin hadisələrin Azərbaycan xalqına qarşı terror aktı olduğunu bildirib. “Azərbaycan” Cəmiyyətinin sədri 20 Yanvar tarixinin hüzn günü olmaqla yanaşı həmçinin Azərbaycan xalqı üçün qürur günü olduğunu vurğulayıb, həmin hadisələrin Azərbaycan Respublikasının müstəqillik əldə etməsindəki əhəmiyyətindən danışıb. O, 20 Yanvar hadisələrinin ertəsi günü o zaman Moskvada olan Heydər Əliyevin Azərbaycanın o zamankı SSRİ paytaxtındakı daimi nümayəndəliyinə gəldiyini və bu qanlı hadisənin təşkilatçılarını ittiham etdiyini, bu faciədə əli olan hər kəsin qanun qarşısında cavab verəcəyini bəyan etdiyini qeyd edib.
Samir İmanov 20 Yanvar hadisələrinə siyasi qiymətin Azərbaycan Respublikası Milli Məclisi tərəfindən 29 mart 1994-cü ildə Azərbaycan Respublikasının prezidenti Heydər Əliyevin sədrliyi ilə keçirilmiş iclasında verildiyini bildirib, həmin qərara əsasən hər il 20 yanvar tarixinin Ümumxalq hüzn günü kimi qeyd olunduğunu vurğulayıb. Daha sonra Samir İmanov keçmiş SSRİ rəhbərliyinin dəstəyi ilə Ermənistanın Azərbaycana qarşı irəli sürdüyü ərazi iddiaları və bunun nəticəsi olaraq Azərbaycan torpaqlarının 20%-nin Ermənistan tərəfindən işğal edildiyini söyləyib və Azərbaycan torpaqlarının hələ də işğal altında qaldığını bildirib.
“Azərbaycan” Cəmiyyətinin sədri Dubay əmirliyinin Milli, Xeyriyyəçilik və Dini işlər üzrə nazirliyinə 20 yanvar faciəsi, erməni terrorçuluğu, Azərbaycan mədəniyyəti və tarixinə dair kitablar təqdim edib. Dubay əmirliyinin Milli, Xeyriyyəçilik və Dini işlər üzrə nazirliyinin Beynəlxalq İslam İnstitutları idarəsinin rəisi Abdullah Yusif Əl-Əli Samir İmanova ətraflı məlumata və təqdim olunan kitablara görə təşəkkürünü bildirib, Ermənistan-Azərbaycan Dağlıq Qarabağ münaqişəsi barədə Yaxın Şərq ölkələrində lazımı səviyyədə təbliğatın aparılmamasından təəssüfləndiyini qeyd edərək “Azərbaycan” Cəmiyyətinin bu sahədəki fəaliyyətini yüksək dəyərləndirib, ədalətin tezliklə bərqərar olunacağına ümidvar olduğunu vurğulayıb.
“Azərbaycan” Cəmiyyətinin sədri Dubay Mərkəzi Kitabxanasının rəhbərliyi ilə də görüşüb onlara 20 yanvar faciəsi barədə ətraflı məlumat və 20 yanvar, Ermənistan-Azərbaycan Dağlıq Qarabağ münaqişəsi, erməni terrorçuluğu, Azərbaycanın zəngin tarixi və mədəni irsinə dair 100-dək kitab hədiyyə edib.
anspress.com
|
