APA-nın məlumatına görə, bu fikirləri Avropa Şurası Parlament Assambleyasının Monitorinq Komitəsinin Azərbaycan üzrə həmməruzəçisi Andres Herkel digər həmməruzəçi Yevgeniya Jivkova ilə Bakıda keçirdiyi birgə mətbuat konfransında söyləyib. O, prezidentin bu məsələ ilə bağlı dəyərləndirməsinə şərik olduğunu bildirib: “Prezidentin “Əgər Avropa Şurasına üzv ölkələrdən birində bir hadisə baş verirsə, bu hadisə digər ölkələrin də həyatına təsir göstərir” fikri ilə razıyıq. Amma bu hər hansı bir ölkədəki situasiyanı əsas götürərək, Azərbaycana dair normaları azaltmağın mümkünlüyü anlamına gəlmir”. Herkel bildirib ki, iyunun son həftəsinin çərşənbə axşamı həmkarı Yevgeniya Jivkova ilə birlikdə hazırladıqları hesabatı AŞ PA-ya təqdim edəcəklər: “Avropa Şurası Parlament Assambleyası da bu hesabat əsasında cümə günü Azərbaycanda siyasi məhbuslarla bağlı xüsusi məruzəçi təyin edilib-edilməməsinə qərar verəcək. Bu, konkret şəxsin təyinatı ilə bağlı deyil, yalnız ümumi xarakterli qərar olacaq”. Azərbaycanda medianın durumuna toxunan həmməruzəçilər bildiriblər ki, üç jurnalistin hələ də həbsdə olması onu narahat edir: “Bu, normal hal deyil. Bizi xüsusilə “Azadlıq” qəzeti ətrafında situasiya ciddi narahat edir. Bütün baş verənlər nəticəsində bu qəzetin kollektivinin sayı 40 nəfərdən 20 nəfərədək azalıb”. Andres Herkel Seçki Məcəlləsi ətrafında mənzərənin kifayət qədər qarışıq olduğunu bildirib: “Seçki Məcəlləsinə yalnız texniki dəyişikliklər edilməsi müxalifətin və vətəndaş cəmiyyətinin narahatlığına səbəb olub. Hətta Məcəllənin ilkin variantı parlamentin müzakirəsinə çıxarılmış olsa belə, Venesiya Komissiyası ilə dəqiqləşdirilməli olan məqamlar kifayət qədərdir. Venesiya Komissiyası ilə danışıqlar başa çatması da bizi narahat edir”. Mətbuat konfransında çıxış edən Yevgeniya Jivkova isə Seçki Məcəlləsinə tezliklə müvafiq dəyişikliklər ediləcəyinə ümidvar olduğunu bildirib: “Ümidvarıq ki, bu dəyişikliklər Venesiya Komissiyasının tövsiyələrinə tam uyğun olacaq”. Andres Herkel həmməruzəçiləri narahat edən məqamlardan birinin namizədlər üçün müəyyənləşdirilən depozitin miqdarı ilə əlaqədar olduğunu deyib: “Fikrimizcə, bu miqdar artırılmalıdır”. O, seçki təbliğatının yalnız İctimai Televiziya ilə aparılmasından, dövlət televiziyasında isə namizədlərə pulsuz efir vaxtının verilməməsindən narahatlığını bildirib.

Bakı. Tamara Qriqoryeva-APA