Vətəndaşlığı olmayanlar və əcnəbilər də sərbəst toplaşmaq hüququna malikdirlər”. L. Hüseynov deyib ki, toplantıların qadağan olunması anlayışı, ümumiyyətlə, qanun layihəsindən çıxarılır: “Yalnız beynəlxalq tədbirlərə hazırlıq ərəfəsində sərbəst toplaşmaq qadağan edilə bilər. Bundan başqa, vətəndaşların əks toplantı keçirmək hüququ tanınır. Hər hansı orqanın qarşısında toplantı keçirilməsi ilə bağlı məsafə 300 metrdən 200-dək azalır. Ziyarətgahlarda, ibadətgahlarda və qəbiristanlıqlarda sərbəst toplaşma ilə bağlı qadağa götürülüb”. Venesiya Komissiyası üzvünün sözlərinə görə, layihədə həmçinin şikayətlə bağlı müddət artırılır, sərbəst toplaşma vaxtı ilə bağlı qadağa götürülür: “Polisin güc tətbiq etməsi yaranan təhlükəyə adekvat olmalıdır. Toplantının yalnız hüquq pozuntusuna yol vermiş iştirakçıları məsuliyyətə cəlb edilə bilər”. Müzakirələr zamanı millət vəkilləri bir sıra müddəalara təklif olunan dəyişikliklərdən narahatlıqlarını ifadə ediblər. Fəzail Ağamalı vətəndaşlığı olmayanlara və əcnəbilərə sərbəst toplaşmaq üçün icazə verilməsinin qəbuledilməz olduğunu deyib. Fazil Qəzənfəroğlu isə xüsusi mülkiyyətlərin qarşısında aksiya keçirilməsinə icazə verilməsini mənfi hal kimi qiymətləndirib. İlyas İsmayılov dinin dövlətdən ayrı olduğunu əsas gətirərək, ibadət yerlərində aksiya keçirilməsinə icazə verilməsindən narazı olduğunu bildirib. Qüdrət Həsənquliyev isə aksiya keçirilməsi üçün vətəndaşlara şəhər mərkəzindən kənarda yer verilməsini sərbəst toplaşmağın məhdudlaşdırması kimi qiymətləndirib: “Şəhərin mərkəzində hər hansı mədəni-kütləvi tədbirlər keçirilirsə, o zaman digər motivli aksiyalara da şərait yaradılmalıdır”. Müzakirələrdən sonra sənəd parlamentin müzakirəsinə tövsiyə olunub.