Açıq demokratik cəmiyyət inkişaf etmiş “üçüncü” sektoru xarakterizə edir. Bu gün Azərbaycanda yüzlərlə həm qeydiyyatdan keçmiş, həm də keçməmiş müxtəlif QHT-lər fəaliyyət göstərir. 90-cı illərin əvvəllərindən başlayaraq ölkəmiz ictimai həyatın bütün sahələrində qeyri-hökumət təşkilatları sektorunun rolunun güclənməsi və güclü inkişafı dövrünü yaşayır. Bu prosesi dəstəkləmək üçün ABŞ və Qərbi Avropanın müxtəlif maliyyə dəstəyi göstərən agentlikləri yerli QHT-lərin köməyinə çatır. Lakin problem bundadır ki, əksər yerli QHT-lər praktiki olaraq Qərbdə maliyyələşmə üçün istifadə edilən müraciət qaydaları haqqında məlumatlı deyil. Çox az şəxslərin professional qərb standartları səviyyəsində fondlara müraciət etmək təcrübəsi var. ABŞ və Qərbi Avropanın mahir qrant yazarlarına görə, maliyyə dəstəyi axtarışında uğur əldə etmək üçün, subsidiya (qrant) əldə etmək üçün müraciət etmə prosesinə bələd olmaq, uyğun gələn maliyyə mənbələrinin tapılması və təhlil etmək, peşəkar qaydada tərtib olunmuş müraciət forması ilə fondu inandırmaq lazımdır ki, məhz müəyyən səbəbə görə fond sizi maliyyələşdirməlidir. Pul vəsaitlərinin axtarılması qeyri-kommersiya təşkilatlarının mühüm vəzifələrindən birinə çevrilib. Tədricən pul vəsaitlərinin axtarılması – fandreyzinq – xüsusi peşəkar idarəetmə sahəsinə çevrilir və qeyri-kommersiya təşkilatlarının inkişafının əsas elementi statusunu alır. Pul vəsaitlərinin axtarışı və cəlb edilməsi üzrə lokal QHT-lərin həyata keçirdikləri tədbirlər bir qayda olaraq təşkilatın marketinq proqramı ilə heç bir əlaqə olmadan aparılır və fandreyzinqin metodları və proseduraları haqqında konkret biliklərdən daha çox intuisiyaya söykənir.

“Xəzər – Gələcək Naminə Tərəfdaşlıq” İctimai Birliyi birinci dəfə deyil ki, qrant yazılması və fandreyzinq üzrə treninq keçirir. Bu cür treninqlərin əsas məqsədi yerli QHT-lərə onların qrant layihələri yazarkən üzləşdiyi konkret problemlərin həllində yardım göstərmək və mümkün maliyyə mənbələri və fondların nümayəndələri ilə danışıqlar aparılması bacarığının öyrədilməsidir.

Növbəti treninq 2005-ci il dekabr ayının 28-də “Xəzər – Gələcək Naminə Tərəfdaşlıq” İctimai Birliyinin ofisində keçirilmişdir. Treninqin əsas ideyası təşkilatımızın volontyorlarına, lokal QHT-lərin nümayəndələrinə və tələbələrə qrant layihələri və proqramlarının yazılması metodları və texnikası haqqında, eləcə də müasir fandreyzinqin əsas alətləri barədə məlumat verməkdir.

Treninqi İctimai Birliyin İcraçı Direktoru Şahin Camalov apardı və iştirakçılara qeyri-hökumət sektorunun müasir demokratiyanın inkişafında rolundan danışdı və həmçinin, təşkilatımızın layihələri haqqında qısa məlumat verdi. Birliyin eksperti Fərid Əliyev qrant əldə edilməsi üçün müraciətin tərtib edilməsi prosesi barədə danışdı. “Xəzər” İnsan Hüquqları Məktəbinin treneri və İctimai Birliyin eksperti Aysel Məmmədova iştirakçılara fandreyzinq və onun əsas alətləri barədə məlumat verdi.

Treninqdə təşkilatımızın volontyorları, Bakı Dövlət Universitetinin tələbələri və yerli QHT-lərin nümayəndələri iştirak ediblər.