Bakı – APA. İslam Konfransı Təşkilatına üzv ölkələrin xarici işlər nazirlərinin Suriyanın paytaxtı Dəməşq şəhərində keçirilən 36-cı konfransının gündəminə Ermənistanın Azərbaycana qarşı təcavüzünə dair 3 qətnamə layihəsi daxil edilib. Azərbaycan XİN-in mətbuat xidmətindən APA-ya verilən məlumata görə, qətnamə layihələri aşağıdakılardır:

- Ermənistanın Azərbaycana qarşı təcavüzünə dair;

- Ermənistanın Azərbaycana təcavüzü ilə əlaqədar Azərbaycana iqtisadi yardımın göstərilməsi haqqında;

- Ermənistan Respublikasının Azərbaycan Respublikasına təcavüzü nəticəsində işğal olunmuş Azərbaycan ərazilərində islam mədəni və tarixi abidələrinin məhv edilməsinə dair.

Plenar iclasda Azərbaycanın xarici işlər naziri Elmar Məmmədyarov çıxış edib. O, öz nitqində nazirlərin 35-ci konfransından sonra təşkilat çərçivəsində fəaliyyət, Azərbaycanda keçirilmiş mühüm beynəlxalq tədbirlər barədə məlumat verib. E. Məmmədyarov erməni təcavüzü və onun nəticələri ilə bağlı Azərbaycanın mövqeyini də iştirakçıların diqqətinə çatdırıb.

Konfransda hesabat nitqi ilə çıxış edən baş katib Ekmələddin İhsanoğlu Ermənistanın Azərbaycana qarşı təcavüzü ilə bağlı İslam Konfransı Təşkilatının birmənalı mövqeyini bir daha ifadə edərək təcavüzü qətiyyətlə pislədiklərini, erməni işğalçılarının dərhal və qeyd-şərtsiz bütün işğal olunmuş torpaqlardan çıxmasını tələb etdiklərini vurğulayıb.

E. Məmmədyarov bir sıra ikitərəfli görüşlər də keçirib.

Konfrans bu gün qərar və qətnamə layihələrinin qəbul edilməsi ilə öz işini tamamlayacaq.