Azərbaycan prezidenti İlham Əliyev hesab edir ki, bu gün “Odessa-Brodı” layihəsinin reallaşdırılması məsələsinin müzakirəsi daha konkret xarakter daşıyır. O, bu barədə Kiyevdə, Ukrayna prezidenti Viktor Yuşşenko ilə birgə mətbuat konfransında məlumat verib.

«Bu layihəyə cəlb edilən bütün ölkələrin siyasi dəstəyi var. Bizə yalnız iqtisadi və texniki detalları razılaşdırmaq, onları təcrübədə sınamaq və nəticələrə baxmaq qalıb», - Əliyev bildirib.

Azərbaycan prezidenti təsdiq edib ki, onun ölkəsi həmişə ixracın diversifikasiyası siyasətinin tərəfdarı olub. İlham Əliyev bir neçə gün əvvəl, Gürcüstanın Qara dəniz sahilində Azərbaycanın sərmayələri hesabına tikilmiş yeni terminalın açıldığını xatırladıb.

Xəzər, Qara və Baltik dənizi regionunda enerji təhlükəsizliyi məsələləri üzrə dördüncü sammit Bakıda keçiriləcək. Bu barədə Kiyevdə keçirilən üçüncü enerji sammitinin yekunları üzrə Ukrayna prezidenti Viktor Yuşşenko cümə günü Kiyevdə Trend News-a məlumat verib.

Azərbaycan prezidenti İlham Əliyev mayın 22-23-də keçirilmiş Kiyev enerji sammitinin nəticələrini müsbət qiymətləndirib.

«Hesab edirəm ki, bu sammitin nəticələri çox müsbətdir və əminəm ki, növbəti sammit üçün bizdə çox sayda müsbət informasiya olacaq», - İlham Əliyev Kiyev enerji sammitindən sonra yekun mətbuat konfransında bildirib.

3-cü enerji sammiti iştirakçıları işlərin yekunları üzrə qlobal energetika təhlükəsizliyi prinsipləri haqqında Kiyev bəyannaməsi, Xəzər-Qaradəniz-Baltik enerji tranziti məkanı haqqında birgə bəyanat, həmçinin Avro-Asiya neft nəqli dəhlizi layihəsi haqqında Azərbaycan Respublikası, Gürcüstan, Litva Respublikası, Polşa Respublikası və Ukrayna prezidentlərinin birgə bəyanatını imzalayıblar.